Stjórnlagaráð

Samtökin Velbú leggja til að ákvæði um dýravelferð verði fest í stjórnarskrá Íslands. Við teljum mikilvægt að í stjórnarskrá sé viðurkenning á því að dýr séu skyni gæddar verur sem geta fundið til sársauka og vanlíðunar og að vegna þessa beri að huga að velferð þeirra í allri lagasetningu og ráðstöfunum sem varða dýr. Þetta er sérstaklega mikilvægt að hafa í huga þegar um er að ræða dýr í vörslu manna, en einnig varðandi umgengni manna við villt dýr. Sambærilegt orðalag er nú komið í dýravelferðarlög í nágrannalöndum okkar, í Rómarsáttmála Evrópusambandsins og jafnvel í stjórnarskrár sumra landa. Við teljum að þróun á Vesturlöndum sé nú í þá átt að viðurkenna að dýr hafi rétt á að vera meðhöndluð á mannúðlegan hátt og því sé rétt að setja ákvæði um dýravelferð í nýja stjórnarskrá.