Stjórnlagaráð

Mig langar að benda Stjórnlagaráði á núverandi ákvæði um auðan kjörseðil.

Í kosningalögunum segir að auður seðill sé ógildur; þetta brýtur fullkomlega í bága við þá sögn sem auði seðillinn á að standa fyrir, þ.e. hið lýðræðislega 'nei' við öllum þeim sem bjóða sig fram. Þessu þarf að breyta svo auður seðill fái þá sögn og þann slagkraft sem honum ber, þ.e. að vera 'nei', á móti hinum ólíku 'já'-um sem fara í kjörkassann.

Í núgildandi lögum er ákvæði um að hver sá sem þvingi mann til að greiða atkvæði gegn betri samvisku eigi yfir höfði sér 4 ára fangelsi. Núgildandi lög meina fólki að skila auðu, m.ö.o. að segja 'nei' við öllum þeim sem bjóða fram, því ef upp kemst að 'kjósandi ógildi seðil sinn viljandi skal hann sæta sektum' - Með núgildandi lögum mætti því góðfúslega benda á að höfundar þeirra skuli sæta 4 ára fangelsi fyrir að meina mér að skila auðum seðli óáreittur.

Núgildandi lög þagga sögn auða seðilsins niður með því að lögfesta að auður seðill sé ógildur.

Þetta er brot á lýðræði, því auður seðill er fullgild sögn og skilaboð viðkomandi kjósanda; jafngildur og sá atkvæðaseðill sem merktur er.

Nú hefur auður seðill um langt árabil ævinlega verið talinn með ógildum atkvæðum. Þannig hefur sögn auða seðilsins verið slævð í huga almennings; gildi hans tekið niður og gert að engu. Hér hafa hagsmunir stjórnmálaflokka á þingi sjálfsagt ráðið mestu, því betra er að neyða menn til að velja einhvern flokk en að skila auðu atkvæði.

Hlutfall auðra seðla var mikið í síðustu sveitarstjórnarkosningum - en þeir féllu marklausir - í stað þess hlutfall þeirra hefði átt að reiknast sem 'autt sæti' í viðkomandi sveitarstjórn. Svipað hlutfall mætti setja í lög um alþingiskosningar, þar sem visst hlutfall auðra seðla næði 'sæti' - og yrði þögul áminning til þeirra sem næðu kjöri út kjörtímabilið.

Auður seðill er skýr sögn í kosningum. Þá sögn þarf að drepa úr Dróma og gera gildandi að nýju.