Stjórnlagaráð

Tillögur að bættum kafla um ráðherra og ríkisstjórn

Í anda samstarfs óska ég eftir því að gera eftirfarandi tillögur í tengslum við kaflann um ráðherra og ríkisstjórn eins og hann var eftir 15. ráðsfund:

1. gr.
Hvað er stjórnarstefna og af hverju bera ráðherrar ekki ábyrgð á málefnum ráðuneyta sem falla utan marka hennar?

4. gr.
Forsætisráðherra gæti alltaf búið til nýtt ráðherraembætti eða endurskilgreint ráðherraembættin þannig að það myndi ekki tæknilega teljast sama ráðherraembætti. Að mínu mati væri betra að takmarka tímann við setu sem ráðherra óháð embætti, annars verður til samkomulag um að skiptast á sætum reglulega.

10. gr.
Mæli með því að málið sé sótt fyrir héraðsdómi fyrst (þ.e. almennum dómstólum). Skv. alþjóðlegum skuldbindingum Íslands skal alltaf vera réttur manna að áfrýja málum til æðra dómstigs og að mínu mati er mikilvægt að vernda mannréttindi ráðherra. Einnig gætu verið mistök í málflutningi eða annað sem gæti krafist áfrýjunar eða ákvörðunar æðra dómstigs.

Einnig mæli ég með því að lágmarksfyrning sé gefin upp svo ekki sé hægt að lækka hana svo mikið að brot fyrnist á svo skömmum tíma að ekki sé hægt að rannsaka þau. Þá mæli ég með því að sá tími sé að lágmarki 5 ár með möguleika á að rjúfa fyrningu um allt að 1 ár á meðan könnun eftirlits- og stjórnskipunarnefndar á sér stað.

Undirritað,
Svavar Kjarrval Lúthersson